Асуулт, Хариулт

Нийгмийн даатгалаа төлдөг бол та байрны лизинг (Орон сууцны зээл) ч хөөцөлдөх боломж үүснэ. Бид таныг машин лизингээр авах гэж байна гэж ойлгож байна. Банкууд ихэвчлэн НД-н дэвтрээр цалинтай хүний орлогыг нотолж байгаа. Гэхдээ та дараах байдлаар нэг оролдоод үзнэ үү. Байгууллагаасаа цалингийн тодорхойлолт, цалингийн карт буюу сүүлийн 6-12 сард авсан цалингийн хүснэгтээ бөглүүлээд авбал банкинд нэг хандаад үзэх хэрэгтэй. Дээрээс нь банкны дансаар цалингаа авч байсан бол боломж улам нэмэгдэнэ. Та манай машины лизинг цэсээр ороход бүх банкны мэдээлэл гарч ирэх бөгөөд “дэлгэрэнгүй” товчийг дарж банкуудтай шууд холбогдон асуултаа илгээсэн ч болно.

Сайн байна уу. Таны барьцаанд тавих байрыг зээл авах банк тань үнэлэх бөгөөд үнэлгээ нь урьдчилгаа төлбөрт дүйцэх шаардлагатай. Үүнийг тодруулбал Та 80 сая төгрөгийн үнэтэй байр худалдан авах гэж байгаа гэж бодъё. Тэгвэл барьцаанд тавих байрны үнэлгээ нь зээлээр худалдан авах байрны үнийн дүнгийн 30%-иас /80 сая* 30%=24 сая/ багагүй үнэлэгдэх ёстой. Та урьдчилан ямар нэг үнэлгээний компаниар үнэлүүлж илүүц зардал гаргах шаардлагагүй. Мөн барьцаанд тавих байр таны өмчлөлийн байх шаардлагатай. Заавал тэдэн өрөө байр байх шаардлагатай гэсэн юм бол байхгүй.

Сайн байна уу. Танай өрхийн орлого 2,050,000 төгрөг байх бөгөөд үүний 45% хувь нь 922,500 төгрөг болох тул Орон сууцны зээл авах боломжтой юм байна. Учир нь урьдчилгаа 30%-иа хасахаар 73,220,700 төгрөгийн зээл авах шаардлагатай болно. Үүнийг 8%-иар 20 жилийн хугацаатай авбал сард 612,447 төгрөг сар бүр төлөх ёстой болно. Таны сард зээлэнд дээд тал нь 922,500 төгрөг төлж болох бөгөөд үүнээс орон сууцны зээлэнд төлөх 612,447 төгрөгийг хасахад цаана нь 310,053 төгрөг үлдэнэ. Энэ дүнгээс таны автомашины зээлийн төлбөр хэтрэхгүй байгаа тохиолдолд машины лизингийнхээ зэрэгцээ орон сууцны зээлэнд давхар хамрагдах боломжтой. Хамтран зээлдэгчийн хувьд таны эхнэр жирэмсний амралтнаасаа ажилдаа эргэн орсон бол шаардлагыг хангах үндэслэлтэй.

Сайн байна уу. Таны цалингийн орлогыг банк нийгмийн даатгал төлж байгаа хэмжээгээр нь баталгаажуулж тооцдог. Тиймээс та өөрийн зээл авах хэмжээгээ дараах зааврын дагуу өөрөө тооцож үзнэ үү. Таны нийгмийн даатгалын дэвтэр бичигдэж буй 1 сарын цалингийн орлого дээр нөхрийнхөө 1 сарын цалинг нэмээд, гарсан дүнгийн 45% нь таны сард орон сууцны зээлэнд төлөх боломжтой төлбөрийн хэмжээ болно. Уг дүнгээ манай сайтын дараах линкээр орж http://www.mongo.mn/calculator/loan2 “Сар бүр төлж чадах зээлийн дүн” хэсэгт оруулна уу. Зээлийн хүү хэсэгт сарын хүүг 0,6666 гэсэн тоог оруулан тооцож үзнэ үү.

Сайн байна уу. Орон сууцны 8 хувийн зээлд танай гэр бүл хамрагдсан тул дахин 8%-ийн орон сууцны зээл авах боломжгүй.

Сайн байна уу. Нэгэнт Банк таны хамтран зээлдэгчийг заавал орлоготой байх шаардлага тавьж байгаа бол дагахаас өөр арга үгүй.Энэ тохиолдолд та өөрийн төрсөн ах дүү нараасаа хэн нэгнийг өөрийн хамтран зээлдэгчээр оруулах эсвэл гэр бүлээ ажилдаа ортол хүлээх болох нь байна

Сайн байна уу. Хаан банк 50,0 хүртэл сая төгрөгийн хугацаагүй хадгаламжиндаа жилийн 6% буюу сарын 0,5% хүү олгохоор зарласан байна. Үүгээр тооцоход 5 сая төгрөг хугацаагүйгээр хадгалуулахад 2 сарын хугацаанд 50,000 төгрөгийн хүү тооцогдох болно.

Банкууд хадгаламжийн хүүгээ 2 янзаар тооцдог. Нэг нь сар бүр хүүгээ хуримтлуулдаг буюу бидний нэрлэж заншсанаар хүүгээс хүү боддог. Нөгөөдөх нь жилд нэг удаа хүүгээ хуримтлуулдаг буюу жилийн дараа хуримтлагдсан хүүгээс хүү бодож эхэлнэ. Хүмүүс ялгааг нь ойлгоход хэцүү тул Монголбанк жилийн бодит хүүгээ ил тод зарлаж байхыг банкуудад үүрэг болгон журамласан. Хүүгээс хүү боддог хадгаламж л ашигтай гэж хүмүүс андуурах нь байдаг. Хүүгээс хүү боддог хадгаламжийн сарын хүү нь харьцангуй бага бол жилийн бодит хүү нь нөгөө жилд нэг удаа хүүгээ хуримтлуулдаг хадгаламжаас ч бага байх тохиолдол нийтлэг байдаг. Тэгэхээр та жилийн бодит хүүг нь тооцож байж банкуудын хадгаламжийг хооронд нь харьцуулах нь зүйтэй. Энэ жишээн дээр жилийн бодит хүү нь 13,2% байхаар тооцож бодсон. Сарын хүү нь 1,04% бөгөөд сар бүр хүүгээ хуримтлуулдаг байхаар жишээ авсан. Гэхдээ жилд нэг удаа хүүгээ хуримтлуулдаг хадгаламжийн жилийн бодит хүү нь 13,2%-с дээш бол мөн ялгаагүй гэдгийг ойлгох хэрэгтэй. Тэгэхээр хүмүүс жилийн бодит хүүг нь тооцож харьцуулахын тулд сарын хүү болон хүү хуримтлуулдаг давтамж хоёрыг нь мэдэж байж тооцон харьцуулах хэрэгтэй. Сар бүр хүүгээ хуримтлуулах, жилдээ нэг удаа хуримтлуулах хоёр аргын тухай та энэ нийтлэлээс дэлгэрэнгүй уншиж болно. http://www.mongo.mn/c/235 Таны хоёр дах асуултанд хариулъя. Одоогоор манай банкууд хүүхдийн хадгаламжийг хамгийн урт хугацаатай буюу 18 нас хүртэл нь нээж байгаа. Хүмүүс өөрсдийнхөө нэр дээр хадгаламж нээлгэсэн тохиолдолд хамгийн ихдээ 3 жилээр хадгаламж нээж өгч байгаа. Та 1 эсвэл 3 жилээр хадгаламжаа нээлгээд хугацааны эцэст сунгаад явахад ялгаа байхгүй. Харин хугацааны эцэст сунгахгүй бол хугацаагүй хадгаламжаар тооцож хүү боддог. Иймд хугацааны эцэст сунгаад явахыг танд зөвлөж байна.

Сайн байна уу. Орон сууцны зээл нь удаан хугацааны зээл байдаг. Тиймээс ихэнх банкууд зайлшгүй хамтран зээлдэгчтэйгээр олгоод байгаа. Дэлгэрэнгүй мэдээлэлийг http://mongo.mn/c/207 , http://mongo.mn/c/135 холбоосуудаар орж авна уу.

Сайн байна уу. Та зээлийн хуваарийн дагуу зээл төлж явсаар сүүлийн сард 4 хоног хэтрүүлэн төлсөн бол таны зээлийн ангилал “Хэвийн зээл” гэдгээр бүртгэгдэх болно. Харин өмнөх саруудын төлбөрийг төлөхгүй явж байгаад таны зээл чанаргүй зээлд ангилагдчихсан нөхцөлд та зээлээ хаасан бол “Хугацаа хэтэрсэн зээл” гэсэн ангилалд бүртгэгдэнэ. Хэрэв сүүлийн хувилбар байсан бол зээлийн үлдэгдлээ бага үлдээж дараа сард төлж дуусгах нь таньд ашигтай байсан. Ингэсэн тохиолдолд хугацаа хэтэрсэн биш хэвийн ангилалд бүртгэгдэж болох байсан. Банкууд сард төлөх төлбөрөө тухайн сард багтаан төлөхгүй бол ангилал шилжүүлж бүртгэдэг. Та энэ талаар дэлгэрэнгүй мэдээлэл авахыг хүсвэл http://mongo.mn/c/314 нийтлэлийг уншина уу.